Karl Gustav Reich - De Silewånderung

HOG-Schäßburg / Siebenbürgen

Karl Gustav Reich

Ä Scheßbrich, bäm Christiani såßen
drå Frängd ister und dommden, åßen
wat nor än't Lädder ännegeng.
Derza drånke sä Kakler Weng.

Wiëm et na biëßer hä gefal,
dem Vinz, dem Jul oder dem Pal,
dåt kangde sä bäm biëste Wällen
no er Zegt nemmih fiëstställen.

I Liter såch em no dem åndern
durch är durschtich Gorjeln wåndern.
Der Weng net nor är Zange list,
hi erriëcht uch äre Gist.

Sä fengen un ze debattieren,
ein kangd se schin vu färhär hiren.
Derbä fahrt, wä u jedem Irt,
der Vinz uch detmol det griß Wirt.

"De Wässenscheft", 'si feng hi un,
"huët schlesslich et erousbekun,
und des Totsach fest na stiht,
dat et en Silewånderung git."

"En Silewånderung? Vinz, na hir,
wä ställst ta dir diën Asänn vir?"
"Haft nor Geduld, blëiwt raich, ir Frängd,
ech bä jo noch glatt net um Ängd!

Wat ech hä son, äs gånz gewäss:
wonn der Mängsch gestorwen äs,
fiërt seng Sil ? nä äs't bekånt
än en åndere Gejestånd.

Of't na e Bum, Blom, e Gedär
oder sonst äst åndert wer.
Ärn Ir silt et gat verstohn,
wäll ich na uch in Bäspäll son.

Ech wärden ist, Ir wärd et sähn,
wel ich jo ängden hangrich bän,
e mächtich Wulf no mengem Did.
Dåt dit mer awer glatt net lid!

Tä, Jul, tä wirscht e Kradder ist,
wel ta af't Wädder dich verstihst."
"Aha", krisch na der Jul derzwäschen,
"verzoaht, wonn ech mich ännemäschen!

"Diëmno wed dro der Pal e Schof?"
Af dåt intfert der Vinz nor grof:
"Mer ta jo äwrich zagehirt,
huëst te noch ängde net kapiert:

Wat ener schin äm Liëwe wor,
wid hi net noch ist, -äs et klor?!"